اهلا اهلا
يا بنات والشباب اللى نوروا الموضوع
ندخل فى الموضوع
متهيألي ان 99,9% من شعب مصر شاف ثلاثية نجيب محفوظ الشهيرة
ويحفظ عن ظهر قلب شخصية
سى السيد
اللي بيضرب زوجته بالشوز ويروح ينضرب هو بره بنفس الشوز
ولكن هل تخيل حد فيكم الوضع اذا كان
سى السيد
راجل حنون
,, رقيق،،
شهم مع زوجته واولاده..
تعالوا نتخيل
:
سى السيد:
مساء الخير يا امينة من فضلك تحضريلى الاكل عشان جاى تعبان من الشغل .
امينة:
اولا:اسمى ست امينة , مش امينة كده حاف.
ثانيا:مفيش اكل لانى اتغديت فى النادى انا والعيال وانا لما بكون شبعانه مابعرفش اطبخ
ثالثا:ياروح الروح كنت تخلى اللى انت جاى من عندها وش الفجر تعملك السم ولا انت فاكرنى خدامة يورفازر..اوفففففف
سى السيد:
خلاص يا ست امينة انا اسف اخر مرة اطلب اكل.
تب ممكن تندهيلى العيال اسلم عليهم عشان وحشونى.
امينة:
عيالى ياحبيبى مابيسلموش على حد ومش فاضيين دلوقتى.البنات بتبص من الشبابيك على اللى رايح واللى جاى ,والولاد قاعدين على القهوة بيعاكسوا البنات الى رايحة واللى جاية.طلبات تانيه ياسوسو..
سى السيد(والدمعة هتفر من عينه) :
لا يا قويه يا مفتريه اهئ اهئ والله لابعتك عند ماما .هه بس
امينة:
يامامى انا خايفة اوى,اغمن عليا ,اغمن عليا خش نام ياللا وبلاش كلام فاضى ,
انا اروح لماما وقت مايعجبنى
واللى مش عاجبه عنده القلة يشربها ويبلع بالزير...فاااهم
فى اليوم التالى:
سى السيد ينتظر فى الشباك امينة لما ترجع من مسرحيه(كشكش بيه)
ويسمع صوتها اتيا من بعيد فيهرول حاملا لمبة الجاز لكى يضئ لها الطريق.
امينة:
ايه اللى مسهرك يا سوسو انا مش قلتلك تنام انت عشان انا هتاخر.
سى السيد:
معلش يا ست امينة انا قلت برضه يمكن تحتاجى حاجة كده ولا كده
امينة:
تيب .. تيب مش عايزة ابوظ الليلة بئى متوجعش دماغى ياسوسو
وانا الصبح حكيلك المسرحيه كلها..اوكـــ
سى السيد:
ربنا يخليكى ويحميكى ومايحرمنيش من دخلتك عليا
الساعة واحدة بعد نص الليل يامراتى يا حبيبتى يا جميله.
امينة تضحك ثم تدخل لتنام وتصفق الباب فى وجهه
فى اليوم اللى بعد التالى:
امينة فى فترة المساء والسهرة مخاطبة سى السيد:
اعمل حسابك ياسى سى,ان فى عريس جاى لعائشه بكره
سى السيد:
مين ياترى..لو كان يعنى من حقى اسال
امينة:
الواد الظابط ده اللى كانت بتعاكسه من الشباك مش فاكره يا سى
سى السيد:
الواحد حيفتكر ايه ولا ايه يا ست امينة على العموم لو انت شايفاه كويس خلاص الشورة شورتك.
امينة:
خلاص نتكل على الله ونخلى الفرح فى نفس يوم فرح خديجة
سى السيد:
ايه ده!هى خديجة بنتى هتتجوز مبروك الف مبروك
امينه:عقبال ولادك
يوم الفرح:
امينة تستقبل الراقصات وترحب بهن وياتى سى السيد ليمارس هوايته المحببه, ان يحاول ان يكون رجلا:
-ايه ده ازاى مش ممكن راقصات فى بيتى.
امينة تتجاهله تماما وتقود الراقصات الى غرف تبديل الملابس ثم تعود متجهمة الى سى السيد قائلة:
اعمل حسابك انك بعد الفرح حتروح لمامتك لغايه ما ابعتلك العيال ياخدوك..مفهووووم
علشان تبئى تقول بيتى دى تانى..رجاله اخر زمن..
وبعد الفرح تم ترحيل سى السيد الى منزل والدته ومازال ينتظر ان تبعث له امينه بالاولاد كى يعيدوه الى بيته..
اه
لا مؤاخذه ...بيتها.
عاوزه اشوف ردودكم ياجماعه عن علاقه الزوج بزوجته
مين ليه الكلمه ومين اللى المفروض يكون ليه الكلمه في البيت
اانا بشوف نماذج بجد بتقهرني والله .
بترحم على الرجاله فعلا
وليه الوضع ده وصل لكده
الراجل بقى بيتنازل عن حاجات كتير اوي مقابل الحفاظ على الاسره السعيده
واللي المفروض كنا بنشوف العكس
هو مش عشان انا بنت يعنى هوافق ان امينه هى اللى تقود مسيرة الاسره
انا بردو اتربيت على ان الراجل راجل والبنت بنت
هو صحيح الرجاله عايزين ياخدوا كل حاجة
وصحيح احنا بنخطط عشان نستولى على كل حاجة بتاعتهم
بس بردو مايكونشى الوضع كده
ثانكس مقدما لكل اللى هينورونى ويردو
الأحد أكتوبر 19, 2008 12:02 pm من طرف ساسو
